Mərkəzi Gömrük Hospitalının Travmatologiya və Ortopediya şöbəsinin rəisi, travmatoloq Ramin Rzayev Türkiyə Respublikasının Ankara şəhərində keçirilmiş Milli Türk Uşaq Ortopediya Konqresində iştirak edib.
Bu barədə Aztibb.az-a Gömrük Hospitalından xəbər verilib.
Konqresdə Azərbaycan, İsrail, Amerika, İngiltərə və müxtəlif ölkələrdən dəvət olunmuş yüksəkixtisaslı mütəxəssislər tərəfindən uşaq ortopediyasını əhatə edən müxtəlif patologiyalarının müasir müalicə üsulları barədə məruzələr edilmişdir.
Eyni zamanda, tədbir çərçivəsində Türkiyyə-İsrail uşaq ortopediyası dərnəklərinin ortaq elmi toplantısı keçirilmiş, mütəxəssislər öz şəxsi təcrübələrində rastlaşdıqları ən çətin patologiyaların müalicə üsullarını nümayiş etdirmiş, mövzular ətrafında maraqlı müzakirələr aparılmışdır. Həmçinin uşaq dayaq-hərəkət sisteminin müxtəlif növ travmalarının müalicəsinə müasir yanaşmalardan, müxtəlif növ yeni implantların tətbiqindən, uşaq travmatologiya-ortopediyasında müalicə müddəti ərzində uşaqların rentgen şüalarından qorunması və şüalanmanın maksimum azaldılması üsullarından danışılmışdır.
Mütəxəssislər zəlzələ zamanı zərərçəkmiş uşaqların dağıntılar altından xilas edilməsi zamanı və xilas edildikdən sonra onların müalicəsində yol verilən səhvləri, müxtəlif ağırlaşmaları və etaplı şəkildə müalicə üsullarını müzakirə ediblər.
Pediatrik ortoediya üzrə onlayn canlı bağlantı ilə bəzi əməliyyatlar nümayiş etdirilib.
Konqresdə uşaq ortopediyası və travmatologiyası üzrə əldə edilmiş yeni məlumatlar Mərkəzi Gömrük Hospitalında Travmatologiya və Ortopediya şöbəsində müxtəlif patologiyaların müasir üsullarla müalicəsində faydası olacaqdır.