Sumqayıt Tibb Mərkəzində (STM) 17 iyun - Tibb İşçilərinin Peşə Bayramı Günü münasibəti ilə tədbir keçirilib.

STM-dən Aztibb.az-a bildirilib ki, öncə Ulu Öndər Heydər Əliyevin, Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların, səhiyyə işçilərinin ruhu bir dəqiqəlik sükutla yad olunub.

Sonra STM-in fəaliyyətindən bəhs edən videoçarx nümayiş olunub.

Sumqayıt Tibb Mərkəzininin direktoru Səkinə Sadıxova əlamətdar gün münasibəti ilə bütün səhiyyə işçilərini təbrik edərək onlara ən xoş arzularını bildirib və şərəfli işlərində uğurlar arzulayıb.

Qeyd edib ki, ulu öndərin siyasi kursunun layiqli davamçısı Prezident İlham Əliyevin diqqət və qayğısının nəticəsində Azərbaycanın səhiyyə sistemində aparılan uğurlu islahatların, tibb müəssisələrinin maddi-texniki bazasının təkmilləşdirilməsinin, təchizat və kadr hazırlığı ilə bağlı görülmüş işlərin bəhrəsini bu gün hər birimiz öz həyatımızda hiss edirik. Dövlət başçısının səhiyyə sahəsində müəyyən etdiyi proqramlar tibb müəssisələrinin təmir və bərpasının, onların ən müasir avadanlıqlarla təchiz olunmasının, vətəndaşların pulsuz dərman vasitələri və preparatlarla təminatının və müalicəsinin, regionlarda diaqnostika mərkəzlərinin tikilərək istifadəyə verilməsinin, xüsusilə uşaqların bütün tibbi xidmətlərlə ən yüksək səviyyədə əhatə olunmasının başlıca istiqamətlərini təşkil edir.

Tədbirin sonunda iş fəaliyyətində fərqlənən və əhalinin sağlamlığının qorunmasında göstərdikləri səmərəli fəaliyyətinə görə bir qrup işçi heyəti fəxri fərmanlarla təltif olunublar.