TƏBİB-in təşkilatçılığı ilə keçirilən Ümummilli Lider Heydər Əliyevin 100-cü ildönümünə həsr olunan Dünyadakı Azərbaycanlı Təbiblərin Simpoziumu öz işinə başlayıb.
Aztibb.az-a TƏBİB-dən bildirilib ki, ilk olaraq qurumun İcraçı direktoru Vüqar Qurbanov, İcraçı direktorun müavinləri – Araz Nəsirov, Anar İsrafilov, struktur bölmə rəhbərləri və tabeli tibb müəssisələrinin rəhbər heyəti, eləcə də simpozium iştirakçıları Fəxri xiyabanda Ümummilli Lider Heydər Əliyevin məzarını ziyarət ediblər.
Ulu Öndər Heydər Əliyevin əziz xatirəsi hörmət və ehtiramla anılıb, məzarı önünə gül dəstələri düzülüb.
Görkəmli oftalmoloq-alim, akademik Zərifə xanım Əliyevanın da xatirəsi yad edilib, məzarı önünə güllər qoyulub.
Sonra Şəhidlər xiyabanı ziyarət edilib, ölkəmizin suverenliyi uğrunda mübarizədə canlarını fəda etmiş şəhidlərin məzarları üzərinə qərənfillər düzülüb, bütün şəhidlərimizin unudulmaz xatirəsi hörmət və ehtiramla anılıb.
