Akademik M.Ə. Mirqasımov adına Respublika Klinik Xəstəxanasının və Yeni Azərbaycan Partiyası Yasamal Rayon təşkilatının birgə təşkilatçılığı ilə 17 İyun - Tibb İşçilərinin Peşə Bayramı Gününə həsr olunan tədbir keçirilib.
Xəstəxanadan Aztibb.az-a verilən xəbərə görə, öncə Fəxri xiyabanda Ümummilli Lider Heydər Əliyevin məzarı ziyarət olunub, önünə gül dəstələri qoyulub, Ulu Öndərin əziz xatirəsi dərin ehtiramla anılıb.
Tədbir Dövlət Himni səsləndirilməsi ilə başlayıb. Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Daha sonra “Heydər Əliyev və Azərbaycan səhiyyəsi” adlı film nümayiş olunub.
Akademik M.Ə.Mirqasımov adına Respublika Klinik Xəstəxanasının direktoru Elviz Qasımov tədbiri giriş sözü ilə açaraq hər il 17 iyun tarixinin Azərbaycanda Tibb İşçilərinin Peşə Bayramı Günü kimi qeyd olunmasının Heydər Əliyevin ölkə səhiyyəsi üçün gördüyü mühüm işlər sırasında xüsusi rol oynadığını diqqətə çatdırıb. Direktor Ümummilli Liderin ölkəmizdə səhiyyənin inkişafı sahəsində gördüyü işlərdən danışaraq Ulu Öndəri müstəqil Azərbaycan dövlətinin və səhiyyəsinin memarı adlandırıb:
"Təsadüfi deyil ki, Ulu Öndər səhiyyə sektorunun inkişafına xüsusi önəm verirdi və bunu əsas prioritet istiqamətlərdən birinə çevirmişdi. Əhalinin sağlamlığının qorunması, tibbi xidmətin yüksək səviyyədə təşkili Ulu Öndərin ən çox diqqət göstərdiyi məqamlardan idi. Məhz onun ölkəyə rəhbərliyi dövründə müasir səhiyyə ocaqlarının istifadəyə verilməsinə başlandı. Nəinki paytaxt Bakıda, ən ucqar regionlarda, kəndlərdə belə ən müasir tibbi mərkəzlər yaradıldı ki, bu mərkəzlərdə tibb işçilərinin fəaliyyəti üçün geniş imkanlar vardı".
Sonra çıxış edən Yeni Azərbaycan Partiyası Yasamal Rayon təşkilatının sədri Bəxtiyar Nəbiyev səhiyyə sahəsində Ulu Öndər tərəfindən başlanan inkişaf strategiyasının bu gün Prezident İlham Əliyev tərəfindən ən yüksək səviyyədə davam etdirildiyini vurğulayıb. Qeyd edib ki, ölkə Prezidenti insan sağlamlığını cəmiyyətimizin sərvəti hesab etməklə yanaşı, Azərbaycan səhiyyə sistemində aparılan islahatlara da yüksək dəyər verir. Yeni tibb müəssisələrinin tikilməsi, bütün mövcud xəstəxana və poliklinikaların yenidən qurulması və modernləşdirilməsi, ən müasir avadanlıqlarla təchizatı səhiyyəmizin yüksəlişinin təzahürləridir. Bu sahədə qəbul edilən dövlət proqramları gələcək nəsillərin sağlam inkişafına bir töhfədir.
Tədbir Respublika Klinik Xəstəxanasının Baş həkimi Sərdar Əsədov və 2-ci Cərrahiyyə şöbəsinin müdiri, professor Sahib Hüseynovun çıxışları ilə davam edib.
Daha sonra peşə bayramı günü və rayonda səhiyyə sahəsində göstərdikləri xidmətlərə görə partiya üzvlərinə Fəxri fərmanlar təqdim olunub.
