Qazax Rayon Heydər Əliyev Mərkəzinin və Qazax Müalicə Diaqnostika Mərkəzinin təşkilatçılığı ilə 15 iyun - Milli Qurtuluş Gününə həsr olunmuş “Milli Qurtuluş Günü Azərbaycan dövlətçiliyinin xilası günüdür” mövzusunda tədbir keçirilib.
Qazax Müalicə Diaqnostika Mərkəzindən Aztibb.az-a bildirilib ki, tədbirdə Heydər Əliyev Mərkəzinin direktoru Ceyhunə Hüseynova çıxış edərək Milli Qurtuluş Gününün dövlətçiliyimiz üçün əhəmiyyətindən və Ulu Öndər Heydər Əliyevin tarixi xidmətlərindən danışıb. Qeyd edib ki, 1993- cü ilin iyun hadisələri tarixin reallığı və Azərbaycanın tarixində dönüş nöqtəsi kimi xarakterizə edilir.
Direktor bildirib ki, xaqımızın tarixində böyük əhəmiyyət daşıyan 15 iyun əsl qurtuluş tarixidir. Xalqımızı nicata aparan yol məhz həmin gündən başlayıb. Bütün şüurlu həyatını canından artıq sevdiyi xalqına, Vətəninə həsr etmiş müdrik dövlət xadimi, Ulu Öndər Heydər Əliyevin böyük siyasi təcrübəsi ilə dövlətçiliyimizin qorunması üçün həyata keçirdiyi qətiyyətli tədbirlər nəticəsində ölkədə davamlı ictimai-siyasi sabitlik bərqərar edildi, bununla da xalqın böyük oğlu Heydər Əliyevin adı tariximizə müstəqilliyimizin memarı, yeni Azərbaycanın banisi kimi qızıl hərflərlə yazıldı.
Sonra Qazax Müalicə Diaqnostika Mərkəzi PHŞ-in direktoru Kamandar İbrahimov çıxış edərək XX əsrin 90-cı illərindəki siyasi-ictimai vəziyyətin gərginliyindən danışıb.
Tədbirdə çıxış edən Qazax Müalicə Diaqnostika PHŞ-in ictimaiyyətlə əlaqələr üzrə mütəxəssisi Günel Bəxtiyarlı bildirib ki, xaos və özbaşnalıq mühitinin hökm sürdüyü bir vaxtda xalqın nicat yolu ancaq Heydər Əliyev idi. Belə çıxılmaz vəziyyətdə dövlətimizin öz müstəqilliyini qoruyub saxlaması üçün Ümummilli Lider Heydər Əliyevin siyasi kursuna ciddi ehtiyac var idi və bu tarixi tələbata çevrilmişdi. Ona görə də xalqın təkidli tələbi ilə dahi insan Naxçıvandan Bakıya dəvət edildi və böyük siyasi xadim xalqını darda qoymadı. Xalqın imdadına yetdi və xalqını düşdüyü bu ağır durumdan çıxardı.
Mərkəzin gənc əməkdaşı Ofeliya Salmanova Azərbaycan xalqının taleyinə qızıl hərflərlə yazılmış Qurtuluş Gününün Azərbaycan üçün ən qürurlu bayramlardan olduğunu vurğulayıb. Bildirib ki, 1997- ci ildən rəsmi olaraq dövlət bayramı kimi qeyd olunan bu tarix müasir müstəqilliyimizin keşməkeşli yollarında ən parlaq izlər buraxıb. Məhz bu parlaq tarixdən sonra Ulu öndərin rəhbərliyi ilə ölkədə aparılan siyasi- iqtisadi islahatlar, peşəkar ordu quruculuğu, əminamanlıq, sabitlik xalqımızın sabaha olan ümidini artırdı, onu müdrik və cəsarətli rəhbərin ətrafında yumruq kimi birləşməyə sövq etdi.
Diqqətə çatdırılıb ki, bu gün Azərbaycan Ulu Öndər Heydər Əliyevin siyasi məktəbinin layiqli davamçısı İlham Əliyevin rəhbərliyi ilə dayanıqlı və davamlı rifaha nail olub, ölkəmiz dünya birliyində etibarlı tərəfdaş kimi qəbul edilib və bundan sonra da dövlət və xalq həmrəyliyi ilə daha yeni uğurlara və nailiyyətlərə imza atacaq.
