14 iyun bütün dünyada Ümumdünya Qan Donoru günü kimi qeyd edilir. Ümumdünya Qan Donoru gününün qeyd edilməsində məqsəd ehtiyacı olanlar üçün qan bağışlayan könüllü qan donorlarına təşəkkür etmək, donor qanına olan zərurəti diqqətdə saxlamaq və insanları qan donorluğuna cəlb etməkdir.

 

Mərkəzi Gömrük Hospitalından Aztibb.az-a bildirilib ki, Ümumdünya Qan Donoru Günündə Azərbaycan Respublikaı Səhiyyə Nazirliyinin Milli Hematologiya və Transfuziologiya Mərkəzi və Mərkəzi Qan Bankı tərəfindən Azərbaycan Respublikası Dövlət Gömrük Komitəsinə qan donorluğunun təşkilatçılığında fəal iştirakına və dəstəyə görə təşəkkürnamə verilib.

 

Təşəkkürnaməni Milli Hematologiya və Transfuziologiya Mərkəzinin icraçı direktoru Valeh Hüseynov Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyevə təqdim edib.

 

Xatırladaq ki, 9 iyun 2023-cü il tarixində Azərbaycan Respublikası Dövlət Gömrük Komitəsinin Tibbi Xidmət İdarəsi və Ə.Eyvazov adına Milli Hematologiya və Transfuziologiya İnstitutunun Mərkəzi Qan Bankı bölümünün birgə təşkilatçılığı ilə “Qan ver, ümid ol” şüarı altında Dövlət Gömrük Komitəsinin əməkdaşları Bahadur Eyvazov adına Elmi-Tədqiqat Hematologiya və Transfuziologiya İnstitutunun Mərkəzi Qan Bankında könüllü qanvermə aksiyasında iştirak ediblər. Dövlət Gömrük Komitəsinin təşəbbüsü ilə keçirilən aksiyada 150-dən çox gömrük əməkdaşı könüllü donor olublar.