Türkiyədə hər il 200 min insan insult keçirir, 50 min insan isə insult və insult ilə bağlı ağırlaşmalar səbəbindən ölür. Düzgün həyat tərzini mənimsəməklə qarşısı alına bilən və müalicəsi mümkün olan insult riskini minimuma endirmək olar.
Aztibb.az-ın medimagazin.com.tr-yə istinadla xəbərinə görə, "İnsult haqqında məlumatlandırma ayı" ilə əlaqədar əhəmiyyətli açıqlamalar verən prof. Mehmet Akif Topçuoğlu risk faktorlarını açıqlayıb, insult ilə bağlı alına biləcək tədbirləri izah edib.
Prof. M.Topçuoğlu iflicin Avropada ən əhəmiyyətli ölüm səbəblərindən biri olduğunu, lakin bunun həm qarşısı alına bilən, həm də müalicəsi mümkün bir xəstəlik olduğunu qeyd edib.
İnsultdan qorunmaq üçün 5 qaydanın sağlam qidalanma, çəki nəzarəti, siqaretdən uzaq durmaq, idman etmək və yaxşı yuxu olduğunu ifadə edən prof. Topçuoğlu insultdan qorunmaq üçün mənimsənilməsi lazım olan həyat tərzini bu sözlərlə sıralayıb:
“Siqaret çəkmək olmaz, siqaret tüstüsünə məruz qalmaq olmaz. Sağlam qidalanmalı, trans yağlardan, hidrogenləşdirilmiş yağlardan, şəkərdən və lazımsız kalorilərdən uzaq durmalı, Aralıq dənizi mətbəxi dediyimiz meyvə-tərəvəz əsaslı, duzu az olan pəhrizi mümkün qədər həyatımıza daxil etməliyik. Heç vaxt oturaq həyat tərzi sürməməliyik, aktiv olmalıyıq. Ən azından bir çox yerə piyada gedib fiziki fəaliyyətə mane olmamalıyıq. Çəkimizi, bədən kütlə indeksimizi bilməliyik və sağlam yatmalıyıq. Ən azı 7 saat yatmaq lazımdır”.