Səhiyyə Nazirliyi İctimai Səhiyyə və İslahatlar Mərkəzində (İSİM) Azərbaycan xalqının Ümumilli Lideri, görkəmli siyasi və dövlət xadimi Heydər Əliyevin 100 illik yubileyinə həsr olunmuş foto-sərginin və bu materiallar əsasında hazırlanan albom-kataloqun təqdimat mərasimi olub. Sərgidə Ulu Öndər Heydər Əliyevin səhiyyə və tibb müəssisələrində, səhiyyə işçiləri ilə görüşlərini əks etdirən 50-dən çox foto nümayiş etdirilib.

 

Bu barədə Aztibb.az-a İSİM-dən xəbər verilib.

 

İSİM-in direktoru Qəhrəman Haqverdiyev açılış nitqi ilə çıxış edərək bildirib ki, zəngin həyat yolu və fəaliyyəti ilə adını tarixə yazan Ulu Öndərimiz Heydər Əliyev üçün ən vacib sahələrdən biri məhz insanların sağlamlığı, səhiyyənin və tibb elminin inkişafı, savadlı, bilikli, əsl peşəkar həkim kadrlarının hazırlanması olub. Direktor qeyd edib ki, Ümumilli Liderin rəhbərliyi ilə səhiyyəmizin müasir tələblər səviyyəsində yenilənməsinə və insanların sağlamlıqlarının qorunmasına xidmət edən 15-dən çox qanun qəbul olunub və sənədlərin hər biri ölkəmizdə səhiyyə sisteminin inkişafına əhəmiyyətli təsir edən mühüm addımlar idi.

 

Sonra İSİM-in Səhiyyə kommunikasiyası şöbəsinin müdiri Laura Quliyeva “Heydər Əliyev və səhiyyə” mövzusunda çıxış edərək Ulu Öndərin bilavasitə rəhbərliyi ilə ölkənin səhiyyə sistemində ardıcıl və məqsədyönlü işlərin görüldüyünü, islahatlarım aparıldığını, xəstəliklərinin yayılmasının qarşısını almaq üçün milli proqramların işlənib hazırlandığını vurğulayıb: “Səhiyyənin marifləndirilməsi, əhalinin tibbi məlumatlılığının artırılması istiqamətində görülən işləri Ulu Öndər yüksək qiymətləndirirdi. O, çıxışlarında vurğulayırdı ki, həkim, səhiyyə təkcə insanları müalicə etmək üçün yox, həm də xəstəliklərin qarşısını almaq, geniş profilaktik iş aparmaq üçündür”.

 

Tədbirdə Səhiyyə Nazirliyinin QİÇS-lə Mübarizə Mərkəzinin direktor müavini Səbinə Babazadə çıxış edərək, Ümumilli Liderin Azərbaycan xalqının hər bir nümayəndəsinin, gənc nəslin sağlamlığına həssaslıqla, doğmalıqla yanaşdığını, xalqımızın demoqrafik göstəricilərinin yaxşılaşması üçün qətiyyətlə mübarizə apardığını diqqətə çatdırıb.

 

Açılışda Ulu Öndərin səhiyyə və tibb müəssisələrinin açılışındakı fotolar əsasında hazırlanan video nümayiş olunub, səhiyyə və tibb işçiləri ürək sözlərini bölüşərək, Ümumilli Lider Heydər Əliyevin xatirəsini hörmət və ehtiramla yad ediblər.