38 yaşlı pasiyent Nargilə Əzizova hamiləliyinin 28-ci həftəsində kəskin bətndaxili hipoksiya, dölün bətndaxili inkişaf ləngiməsi, uşaqlıq üzərində çapıq, sağrı gəlişi, talassemiya daşıyıcısı diaqnozu ilə TƏBİB-in tabeliyindəki Respublika Perinatal Mərkəzində daxil olub.

 

TƏBİB-dən Aztibb.az-a bildirilib ki, pasiyent 02.03.2023-cü il saat 00:40 radələrində tibb müəssisəsində keysəriyyə kəsiyi əməliyyatı ilə çəkisi 845 qr, boyu 33 sm olan oğlan uşağı dünyaya gətirib. Körpə ilk olaraq Mərkəzin Yenidoğulmuşların reanimasiya şöbəsinə, daha sonra isə Patologiya şöbəsinə yerləşdirilib.

 

79 gündən sonra kafi vəziyyətdə evə yola salınan körpənin çəkisi 1, 450 qram olub.

 

Qeyd edək ki, körpənin müalicə müddətindəki xərcləri icbari tibbi sığorta ilə qarşılanıb.