Bakı Baş Səhiyyə Mərkəzində ilkin səhiyyə xidməti göstərən tibb müəssisələrində xidmət keyfiyyətinin yüksəldilməsi, optimallaşdırılması və məlumatların elektronlaşdırılmasına dair təlim keçirilib.
Mərkəzdən Aztibb.az-a bildirilib ki, təlim İcbari Tibbi Sığorta üzrə Dövlət Agentliyinin İnformasiya texnologiyaları və innovasiyalar idarəsinin baş məsləhətçisi Samir Məmmədov tərəfindən keçirilib.
Elektronlaşdırma üzrə sistemin yaxın gələcəkdə bütün respublika üzrə tətbiq ediləcəyini bildirən agentliyin əməkdaşı S.Məmmədov bildirib ki, bu prosesin uğurlu icrası üçün belə təlimlərin keçirilməsi mütləq və zəruridir. Prosesin necə aparılacağı və diqqət edilməsi vacib məsələləri əyani olaraq tibb işçilərinin diqqətinə çatdıran mütəxəssis təlimdə eyni zamanda vətəndaşlara sağlamlıq, sürücülük və digər tibbi arayışların verilməsi zamanı elektron sistemdə onun qeydiyyatının düzgün aparılması barədə ətraflı məlumat verib.
Təlimdə, həmçinin məlumatların elektron sistemdə qeydiyyatı zamanı yarana biləcək çətinlik və problemlərlə bağlı müzakirələr aparılıb.
Sonda təlim iştirakçılarının sualları cavablandırılıb.
