Uşaq cərrahiyyəsi rezidentlərinin növbəti elmi toplantısı Mərkəzi Gömrük Hospitalında baş tutub.

Bu barədə Aztibb.az-a Hospitaldan xəbər verilib.

Elmi toplantını giriş sözü ilə açan Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev Mərkəzi Gömrük Hospitalının mütəxəssislərarası təcrübə mübadiləsinin təşkil edilməsi istiqamətində olan fəaliyyətlərə daim dəstək verməyə hazır olduğunu bildirib.

Daha sonra t.ü.f.d., dosent Allahverdi Musayev çıxış edərək elmi toplantının Mərkəzi Gömrük Hospitalında yüksək səviyyədə təşkilinə görə Dövlət Gömrük Komitəsinin Tibbi Xidmət İdarəsinin rəhbərliyinə və əməkdaşlarına təşəkkür edib.

Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin mütəxəssisi Şəhla Mirzəzadə də öz növbəsində çıxış edərək, həyata keçirilən davamlı tibbi təhsil tədbirləri barədə geniş məlumat verib və tədbir iştirakçılarını Tibbi Xidmət İdarəsi tərəfindən təşkil olunan elmi tədbirlərdə aktiv iştirak etməyə dəvət edib.

Elmi toplantı zamanı K.Fərəcova adına Elmi-Tədqiqat Pediatriya İnstitutunun uşaq cərrahı Cavid Nağıyev “Ağciyər exinokokkozunun cərrahi müalicəsi”, Baku Medical Plazanın uşaq cərrahı Aqil Əbilov "Ureteropelvik darlıq” və Mərkəzi Gömrük Hospitalının Uşaq Cərrahiyyəsi şöbəsinin rəisi Vüsal Cəfərov “Kontrolateral sidik axarı reflüksü” mövzusunda təqdimatlarla çıxış ediblər.

Sonda rezidentləri maraqlandıran suallar cavablandırılıb.