Türkiyənin Antalya-Bələk bölgəsində Türk Toraks Dərnəyinin 26-cı beynəlxalq konqresi təşkil edilib. Beynəlxalq tədbirdə ölkəmizi Azərbaycan Tibb Universitetinin (ATU) Ağciyər xəstəlikləri kafedrasının müdiri Rafiq Bayramov və kafedranın dosenti Ceyhun İsmayılzadə təmsil ediblər.

Bu barədə Aztibb.az-a ATU-dan məlumat verilib.

Kafedranın əməkdaşları "Dərmanlara davamlı ağciyər vərəmi və xroniki obstruktiv ağciyər xəstəliyinin komorbid gedişi" mövzusunda məruzələrini təqdim ediblər.  

Konqresdə dünyanın bir çox ölkələrindən (ABŞ, Böyük Britaniya, Çexiya, Polşa, İtaliya və s.) minə yaxın mütəxəssis, o cümlədən  dünyada ağciyər xəstəlikləri üzrə tanınmış bir sıra qurumların rəhbərləri və nümayəndələri pulmonologiyanın aktual problemlərinə dair məruzələrlə çıxış ediblər. İştirakçılardan Amerika Torakal, Avropa Respirator cəmiyyətlərinin rəhbərlərinin məruzələri xüsusi maraqla qarşılanıb.