Kürdəmir Rayon Mərkəzi Xəstəxanası Ailə Sağlamlıq Mərkəzinin həkim-stomatoloqu Ramil Kərimov dişlərin sağlamlığını qorumaq üçün faydalı məsləhətlərini verib.

 

Aztibb.az-ın xəbərinə görə, həkim bildirib ki, dişlərin sağlamlığını qorumaq üçün əsas şərt gigiyena qaydalarına əməl etməkdir. Gigiyena qaydaları deyəndə isə, ilk növbədə, yadımıza dişləri vaxtında və düzgün fırçalamaq düşür. Lakin dişlərə düzgün qulluq qaydalarını çoxlarımız bilmirik. Hər gün doğru bilərək etdiyimiz yalnışlar dişləri vaxtından tez sıradan çıxmasına, onların itirilməsinə səbəb olur.

 

Ramil Kərimov gündəlik yol verilən bir çox yalnışların dişlərdə, diş ətində problemlərə yol açdığını da diqqətə çatdırıb. Onun sözlərinə görə, diş fırçalarının uzun zaman istifadə etmək gündəlik yol verilən  yalnışlardan biridir: "Bir diş fırçasının təxmini ömrü 3 aydır. Təxminən 200 dəfə istifadə edəndən sonra onu dəyişməlisiniz. Uzun zaman işlənən fırça dişləri düzgün təmizləyə bilməməklə yanaşı, həm də bakteriya mənbəyi sayılır".

 

Stomatoloq qeyd edib ki, dişləri lazım olduğu qədər fırçalamamaq-fırçalamaya təxminən 1 dəqiqəyə yaxın zaman ayırmaq vacibdir. Fırçanı düzgün hərəkət etdirmək lazımdır.