TƏBİB-in tabeliyində fəaliyyət göstərən Bakı Şəhəri Təcili və Təxirəsalınmaz Tibbi Yardım Stansiyasının 10 briqadası "Bakı Marafonu"nda xidmət göstərmək üçün təhkim olunub. Tibbi briqadalar tərəfindən zərurət yarandığı hallar üzrə ilkin yardım göstərilib. 30-dək yarış iştirakçısına müxtəlif travmalar, arterial hipertenziya, hipotenziya səbəbilə yardım olunub.

Bu barədə Aztibb.az-a TƏBİB-dən məlumat verilib.

Eyni zamanda, TƏBİB tərəfindən “Bakı Marafonu”nun 45 nəfərədək supervayzer və könüllülərinə yarış iştirakçılarının səhhətində yarana biləcək problemlər zamanı ilkin yardım göstərə bilmələri üçün təlim keçirilib.

Heydər Əliyev Fondunun təşəbbüsü ilə "Bakı Marafonu" Təşkilat Komitəsi tərəfindən mayın 7-də "Küləyə qalib gəl" devizi altında keçirilən ümumrespublika yarışı idmanın inkişafına dəstək göstərmək, sağlam həyat tərzini təbliğ etmək məqsədi daşıyır.

TƏBİB-in əməkdaşları da ümumrespublika yarışında iştirak edərək öz güclərini sınayıblar.

Yarışda kişilər arasında 1-ci yeri ukraynalı idmançı Boqdan Simonoviç qazanıb. Gürcüstanlı David Karataşvili finişə 2-ci, türkiyəli Arkan Çoban 3-cü çatıb.

Qadınlar arasında ukraynalı Natalya Simonoviç qalib olub. 2-ci yerdə türkiyəli Hasibe Demir, 3-cü yerdə ukraynalı Valentina Poltavska qərarlaşıb.