Bakı Sağlamlıq Mərkəzində 5 may - Dünya Əl Gigiyenası Gününə həsr edilən maarifləndirici tədbir keçirilib.

Aztibb.az-a Mərkəzdən bildirilib ki, tədbirdə müəssisənin icraçı direktoru, dos. Asiman Həsənov Dünya Əl Gigiyenası Gününün yaranma tarixi və bu günün əsas mahiyyəti haqqında məlumat verib. O, səhiyyə sistemi inkişaf etmiş ölkələrin tibb müəssisələrində infeksiyaların profilaktikası və buna nəzarətin təşkili ilə bağlı görülən işlərdən nümunələr gətirib. Bildirib ki, mərkəzdə infeksiyanın qarşısının alınması və infeksiyaya nəzarət tədbirlərinin gücləndirilməsi yolunda silsilə işlər görülür və Bakı Sağlamlıq Mərkəzinin ÜST ilə əməkdaşlığı nəticəsində qurulan infeksiyaya nəzarət komitəsi də bu yolda atılan adddımlardan biridir.

Ümumdünya Səhiyyə Təşkilatının (ÜST) infeksiya xəstəlikləri uzmanı Muammer Çelik Azərbaycanın səhiyyə sahəsində sistemli infeksiya nəzarət proqramı qurmaq və pilot layihə kimi Bakı Sağlamlıq Mərkəzində bunu tətbiq etməkdən məmnunluq duyduğunu bildirib.

Mərkəzin İnfeksiyaya nəzarət bölməsinin rəhbəri, həkim infeksionist Ləman Qalimova çirkli əllərdə olan virus və bakteriyaların respirator xəstəlikləri, virus hepatitləri, bağırsaq infeksiyaları və COVID-19 kimi bir çox xəstəliklərin yayılmasını sürətləndirdiyini bildirib. Həkim infeksionist bu səbəbdən də indiki dövrdə tibb işçilərini olduqca diqqətli olmağa çağırıb.

Sonda Bakı Sağlamlıq Mərkəzinin və Ümumdünya Səhiyyə Təşkilatı əməkdaşlarının hazırladığı marifləndirici videoçarx təqdim olunub.