Bir araşdırmaya görə, bağçılıq və gəzinti kimi daha yüngül məşqlər etmək döş xərçəngi riskini 21 faizə qədər azalda bilər.

Aztibb.az medimagazin.com.tr-yə istinadla bildirir ki, İngiltərədə 48 000-dən çox qadın üzərində aparılan araşdırmada gəzinti, ev işləri kimi yüngül fiziki fəaliyyətlərin döş xərçəngi riskini aşağı saldığı ortaya çıxıb.

Tədqiqatda gündə 5 saat 45 dəqiqədən çox yüngül fiziki fəaliyyətlə məşğul olmağı bacaranların döş xərçəngi riski 21 faiz azalıb.

Mütəxəssislər deyirlər ki, hətta işləyən insanlar da işə piyada getsələr, nahar fasiləsində gəzintiyə çıxsalar, evə gələndə yemək bişirməyə, qab-qacaq yumağa və ev işlərini tamamlamağa vaxt ayırsalar, buna asanlıqla nail ola bilərlər.

Qlazqo Universitetində tədqiqata daxil edilən qadınlara fitnes izləyicisi quraşdırılıb və gündəlik həyatlarına normal davam etmələri xahiş edilib. 48 286 qadından ibarət iştirakçılar 39-71 yaş arasında olub.

Nəticələr göstərib ki, ən aktiv qadınların dörddə biri həftədə 2419 dəqiqədən çox yüngül fiziki fəaliyyətlə məşğul olub (gündə təxminən beş saat 45 dəqiqə).

Bütün qadınlar orta hesabla beş il yarım izlənilib və bu müddət ərzində onlardan 836-da döş xərçəngi aşkarlanıb. Yüngül fiziki fəaliyyətlə ən çox məşğul olanların döş xərçənginə tutulma ehtimalı ən az aktiv olan qadınların dörddə biri ilə müqayisədə 21 faiz az olub.