Avropa İttifaqının maliyyə dəstəyi ilə Ümumdünya Səhiyyə Təşkilatı (ÜST) və BMT-nin Uşaq Fondu (UNICEF) 24-29 aprel - Avropa İmmunlaşdırma Həftəsində maarifləndirmə xarakterli silsilə tədbirlər həyata keçirilir.

 

Ümumdünya Səhiyyə Təşkilatı (ÜST) və BMT-nin Uşaq Fondunun (UNICEF) dəstəyi, Tibbi Ərazi Bölmələrini İdarəetmə Birliyi (TƏBİB), Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyinin təşkilatçılığı ilə baş tutan tədbirlər “Peyvəndin vaxtını gecikdirmə! Hər doza vacibdir!” şüarı altında təşkil edilir.

 

Bu barədə Aztibb.az-a TƏBİB-dən məlumat verilib.

 

İmmunlaşdırma kampaniyası daxilində peyvəndlərlə əhatə dairəsi aşağı olan TƏBİB-in tabeliyindəki Yevlax və Qobustan rayon mərkəzi xəstəxanalarında valideyn konfransları baş tutub. Bu konfranslar zamanı Azərbaycan Tibb Universitetinin dosenti, həkim-pediatr Nigar Bayramova, həkim-pediatr Aytən Ziyadova tərəfindən valideynlərə uşaqların vaxtında peyvənd olunmasının əhəmiyyəti haqqında məlumat verdikdən sonra peyvəndləmədən kənarda qalan uşaqlar yerindəcə peyvənd olunub.

 

Qeyd edək ki, tədbirlər Avropa İttifaqının maliyyələşdirdiyi Vaksinasiyaya Dəstək layihəsi çərçivəsində ÜST və UNICEF tərəfindən TƏBİB, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi, Yevlax Rayon İcra Hakimiyyəti, Qobustan Rayon İcra Hakimiyyəti, Yevlax Rayon Mərkəzi Xəstəxanası, Qobustan Rayon Mərkəzi Xəstəxanası ilə əməkdaşlıqda həyata keçirilib.