Malyariya parazitləri insanın qanına düşdükdə dövr edərək qaraciyərə keçir, onun hüceyrələrinə nüfuz edir, orada böyüyərək çoxalır. Sonradan parazitlər qaraciyəri tərk edərək eritrositlərə daxil olur.
Aztibb.az xəbər verir ki, bu barədə məlumat verən Xətai Tibb Mərkəzinin həkim-terapevti Tofiq Şıxəliyev qeyd edib ki, bu proses bir həftədən bir neçə aya kimi davam edə bilər.
Onun sözlərinə görə, parazitlər qaraciyərdə olduqda insan heç bir narahatlıq hiss etmir.
"Malyariyanın simptomları yüksək qızdırma, üşütmə, baş ağrıları, əzələ ağrıları və yorğunluqdur. Eyni zamanda, ürək bulanması, qusma və ishal da müşahidə oluna bilir. Eritrositlərin parçalanması səbəbindən malyariya anemiyanın yaranmasına və eləcə də ödün dağılmasına (dəri və gözlərin saralması) gətirib çıxara bilər”, - deyə həkim bildirib.
Tofiq Şıxəliyev qeyd edib ki, malyariya parazitinin ən təhlükəli növü olan Plasmodium falciparum tərəfindən törədilən xəstəlik zamanı böyrək çatışmazlığı, epileptik qıcolmalar, əqli pozuntular, koma, və vaxtında müvafiq tibbi köməyin göstərilmədiyi təqdirdə ölüm baş verə bilər:
"Malyariya xəstəliyi vaxtlı-vaxtında və müvafiq şəkildə müalicəyə cəlb olunduğu halda o, tam müalicə edilir".
Həkim profilaktik tədbirləri vacib hesab edir. Onun sözlərinə görə, profilaktika infeksiyanın qabağının alınması üçün malyariyaya qarşı olan vasitələrin istifadəsi ilə xəstəliyin qarşısının alınmasına yönəlmiş tədbirdir, lakin tam qorunmanı təmin edə bilmir və malyariya keçiriciləri olan ağcaqanadların sancması riskinə məruz qala bilən insanlar üçün məsələnin tamamilə səmərəli və eləcə də uzunmüddətli həll üsulu sayıla bilməz:
"Qarşıdan isti yay ayları gəlir. Simtomları özünüzdə və ya yaxınlarınızda hiss etdinizsə dərhal həkimə müraciət etməyiniz məsləhətdir".