Azərbaycan Tibb Universitetində (ATU) tanınmış detektiv yazar Elxan Elatlının tələbələrlə görüşü keçirilib.

Universitetdən Aztibb.az-a verilən xəbərə görə, tədbirdə çıxış edən ATU-nun Tərbiyə işləri üzrə prorektoru, dosent Zülfüqar Musabəyov Azərbaycan Yazıçılar Birliyinin üzvü, “Qızıl qələm” mükafatı laureatı Elxan Elatlının əsərlərinin ən çox oxunan və satılan kitablar arasında olduğunu bildirib. O, çoxsaylı oxucuların rəğbətini qazanmış yazarın bu gün tələbələrimizlə görüşünün maraqlı olacağını söyləyib.

Yazıçı belə bir görüşə şərait yaratdığına görə universitet rəhbərliyinə təşəkkür edib.

Görüş zamanı yazıçı yazdığı əsərlərlə bağlı məlumat verib. Daha sonra müəllifin “Uğursuz gecə”, “Xəyanət”, “Dilənçi qadının sirri”, “Arxalı canavar”, “Qanbay Qasımlının xəfiyyələri”, “Qan ləkəsi”, “Yeddinci mərtəbədə qətl”, “Xəstə ruhlar”, “On dördüncü adam”, “Qazinin ölümü” və sair əsərlərinin süjet xətti, əsas personajları müzakirə edilib.

E.Elatlı tələbələrin çoxsaylı suallarını ətraflı şəkildə cavablandırıb.

Görüşün sonunda yazıçıya universitetin hədiyyəsi təqdim olunub və tələbələrlə xatirə şəkli çəkilib.