Sumqayıt Tibb Mərkəzinin tabeliyindəki tibb müəssisələrində "Heydər Əliyev İli" çərçivəsində silsilə tədbirlər davam etdirilir.

Aztibb.az-a STM-dən verilən xəbərə görə, növbəti belə tədbir Uşaq Xəstəxanasında keçirilib.

"Ulu Öndər Heydər Əliyevin irsi milli sərvətimizdir" mövzusunda keçirilən tədbiri giriş sözü ilə açan Uşaq Xəstəxanasının Poliklinika şöbəsinin müdiri Esmira Hüseynova Ümumilli Lider Heydər Əliyevin ölkəyə rəhbərlik etdiyi dövrdə hərtərəfli inkişafı özündə əks etdirən bir sıra proqramlar həyata keçirdiyini bildirib. Qeyd edib ki, Heydər Əliyevin miras qoyduğu irs cəmiyyətimizinin hər sahəsinin inkişafında öz töhfəsini verməkdədir.

Xəstəxananın Yoluxucu xəstəliklər şöbəsinin müdiri, Əməkdar həkim Sehri Babayev isə çıxışında vurğulayıb ki, müstəsna xidmətləri ilə əbədilik qazanan dahi lider Heydər Əliyevin mənalı həyat yolu, zəngin və çoxşaxəli irsi tükənməz ibrət məktəbidir. O, intibah və milli şüurun oyanışının Heydər Əliyevin hakimiyyətə gəlişi ilə başladığını, müstəqilliyimizin məhz onun sayəsində əbədi və dönməz xarakter aldığını vurğulayıb.

Qeyd edib ki, ölkəmiz dünyada layiq olduğu mərtəbəyə Ulu Öndərin uzaqgörənliyi, müdrikliyi, qətiyyəti, dəmir iradəsi, zəngin dövlətçilik təcrübəsi sayəsində yüksələ bilib.

Digər çıxış edənlər - Pediatriya şöbəsinin müdiri Ümidə Mehdiyeva, tibb bacıları Tünzalə Ağayeva və Sevilə Həsənova bildiriblər ki, Ümummilli Liderin ideyaları Azərbaycanın dünəni, bu günü və gələcəyinə hesablanmış fəaliyyət proqramı, strategiya, dövlət konsepsiyasıdır.

Natiqlər Heydər Əliyev ideyalarının müstəqil Azərbaycanımıza daha böyük uğurlar qazandıracağına, müstəqil, demokratik, dünyəvi dövlətimizi dünya müstəvisində daha da qüdrətli edəcəyinə əminliklərini ifadə ediblər.