Sumqayıt Tibb Mərkəzinin (STM) 1 nömrəli Ailə Sağlamlıq Mərkəzində (ASM) “Heydər Əliyev İli” çərçivəsində “Heydər Əliyev və Sumqayıt səhiyyəsi” mövzusunda tədbir keçirilib.
Aztibb.az-a STM-dən verilən xəbərə görə, tədbiri giriş sözü ilə açan 1 nömrəli ASM-in baş həkimi Təranə Mansurova bildirib ki, Azərbaycan Respublikası Prezidentinin 29 sentyabr 2022-ci il tarixli Sərəncamı ilə 2023-cü il ölkəmizdə “Heydər Əliyev İli” elan edilib.
T.Mansurova qeyd edib ki, Ulu Öndər Heydər Əliyevin Azərbaycana rəhbərliyi dövründə əhalinin sağlamlıq durumu üçün böyük əhəmiyyət daşıyan tədbirlər həyata keçirilib. Həyata keçirilən genişmiqyaslı islahatlar əhalinin sağlamlığının qorunmasına, xalqımızın həyat səviyyəsinin yaxşılaşdırılmasına xidmət edib.
Daha sonra ailə həkimi, terapevt Gülşən Hüseynova, Pediatriya şöbəsinin müdiri Şəbnəm Səlimova, ailə həkimi, terapevt Vüsalə Cavadzadə və ailə həkimi, pediatr Kəbirə Həsənova çıxış edərək dahi lider Heydər Əliyevin ölkəmizdə mövcud səhiyyə ocaqlarının profilinin genişləndirilməsinə ciddi əhəmiyyət verdiyini bildiriblər.
Qeyd olunub ki, 70-ci illərin əvvəllərində Heydər Əliyevin sayəsində Sumqayıtda 17-dən çox yeni tibb müəssisəsi açılıb. 1993-cü ildə böyük dövlət xadimi Heydər Əliyevin ikinci dəfə ali hakimiyyətə qayıdışından sonra bütün sahələr kimi səhiyyənin də inkişaf mərhələsinə qədəm qoyulub.
Diqqətə çatdırılıb ki, Ümummilli Lider Heydər Əliyevin müəyyənləşdirdiyi strateji siyasət kursunu layiqincə davam etdirən Prezident İlham Əliyevin həyata keçirdiyi sosial siyasət tibb müəssisələrinin fəaliyyətinin yaxşılaşdırılmasına, ümumilikdə, tibbi xidmətin müasir tələblər səviyyəsinə qaldırılmasına yeni imkanlar açır. Xüsusilə son illərdə Sumqayıt şəhərində tibb xidmətinin keyfiyyətinin yaxşılaşdırılması istiqamətində mühüm işlər həyata keçirilir, müasir tələblərə cavab verən səhiyyə infrastrukturu yaradılır.
Bildirilib ki, Sumqayıtda fəaliyyət göstərən səhiyyə ocaqlarının əksəriyyəti təmir olunub, həmçinin tibb müəssisələri müasir avadanlıqlarla təchiz edilib.