Düz bağırsağın stenozu - düz bağırsağın daralması olub, fərqli səbəblərə bağlıdır. Buna anadangəlmə qüsurlar, travmatik zədələnmə, iltihabi proseslər, şiş xəstəlikləri göstərmək olar. Sonradan qazanılmış formada klinik əlamətlər mərhələli şəkildə meydana çıxır.

Aztibb.az xəbər verir ki, bu barədə Xətai Tibb Mərkəzinin cərrah-proktoloqu, Cərrahiyyə şöbəsinin müdiri Janna Xudaverdiyeva məlumat verib.

Həkim bildirib ki, xəstədə defekasiya zamanı çətinlik, bağırsağın selikli qişasının ikincili zədələnməsi, nəcisi saxlamamaq kimi əlamətlər müşahidə olunur. Nəcisdə irin və qan görünə bilər. Anadangəlmə formada əlamətlər doğuşdan sonra meydana çıxır. Patologiya mekonial kütlələrin çıxışında çətinliklə özünü biruzə verir. Qarın həcminin tədricən artması müşahidə oluna bilər.

Onun sözlərinə görə, vaxtında müalicə və profilaktika məqsədilə düz bağırsağın stenozuna səbəb olacaq yoğun bağırsağın patologiyalarını izləmək və aradan qaldırmaq lazımdır.