ÜST-nin Avropa üzrə Regional Ofisi və Rumıniyanın Səhiyyə Nazirliyinin birgə təşkilatçılığı ilə Buxarest şəhərində “Hərəkət etmək vaxtıdır" adlı regional görüş keçirilib.
Aztibb.az ÜST-nin Azərbaycan nümayəndəliyinə istinadla xəbər verir ki, tədbir Avropada və Mərkəzi Asiyada səhiyyə işçilərinin müdafiə olunması, dəstəklənməsi və bu sahəyə investisiya qoyuluşu kimi istiqamatlər üzrə əhəmiyyətli mövzulara həsr olunub.
ÜST-nin Avropa regionundakı üzv 53 dövlətdən 50-nin iştirakı ilə keçirilən görüşdə Azərbaycan ÜST-nin Azərbaycan nümayəndəliyi, Səhiyyə Nazirliyi, TƏBİB, Azərbaycan Tibb Universitetinin Tədris Cərrahiyyə Klinikası və "Yeni Klinika"nın əməkdaşlarından ibarət nümayəndə heyəti ilə təmsil olunub.
Tədbirdə üzv 44 ölkədən 13-də həkimlərin 40 %-nin artıq 55 və daha yuxarı yaşda olması və bu göstəricinin işçi qüvvəsinin davamlılığı üçün ciddi problem yaratdığı diqqətə çatdırılıb. Bildirilib ki, bəzi ölkələrin gəncləri səhiyyə sisteminə cəlb etməsi və onları bu sahədə davam etməyə təşviq etməsi getdikcə daha da çətinləşir.
Sonda iştirakçılar tərəfindən Buxarest Bəyannaməsi qəbul olunub. Bəyannamə səhiyyə işçilərinin işə qəbulu, onların fəaliyyətinin optimallaşdırılması, bu sahəyə dövlət investisiyasının artırılması və digər mühüm istiqamətlər üzrə məsələləri əks etdirir.
