"Qaşlar üz cizgiləri arasında önəmli yer tutur. Üz ifadəsi, emosiyalar qaşlarla tamamlanır".

Aztibb.az xəbər verir ki, bu barədə həkim trixoloq Samirə Səmədova qaşların daha sıx və gözəl olması üçün düzgün qulluq qaydaları haqqında danışarkən deyib.

O, bildirib ki, qaşlara qulluq onları düzgün təmizləməkdən başlayır:

"Qadınların əksəriyyəti istifadə etdikləri gecə və gündüz kremlərini, dekorativ kosmetikanı qaşlarına da çəkirlər. Bu, ən çox yayılan səhv addımdır. Çünki, bu vasitələr dəri məsamələrini tutur, qaşdakı tüklər yüklənir, beləliklə tüklərin inkişafı zəifləyir və hətta tökülə bilir. Ona görə həm makiyaj etdikdə, həm də gecə və gündüz kremi çəkdikdən sonra qaşları pambıq disklə silmək lazımdır.

Gündə iki dəfə qaşlara masaj istifadə etmək tövsiyə olunur. Masaj qan dövranını yaxşılaşdırmaqla tüklərin inkişafına müsbət təsir edir. Barmaqların ucu ilə yüngül döyəcləmə və ya cimdikləmə, vibrasiyaedici hərəkətlərlə masaj etmək olar".

"Qaşlara qullugun ən vacib hissəsi follikulları qidalandırmaq və möhkəmləndirməkdir. Bu məqsədlə yağlardan istifadə olunur. Yağlar qaşdakı tüklərin keyfiyyətini yaxşılaşdırır və böyüməsini sürətləndirir.

Buraya kokos, jojoba, gənəgərçək, badam yağları və s. daxildir.

Bu yağları tək və ya bərabər hissələrlə qarışdırıb istifadə etmək olar. Müsbət nəticə almaq üçün ardıcıl və uzun müddət istifadə etmək lazımdır. Yağı qaşlara çəkərkən bir damcı kifayət edir. Əks halda dəri qıcıqlanır ki bu zaman məsamələr tutula və iltihablaşa bilər. Əgər qaşlarınızı korreksiya etmisinizsə, sağalmadan yag çəkməyin", - deyə, həkim qeyd edib.