48 yaşlı qadın uşaqlıq qanaxması ilə Səhiyyə Nazirliyi Elmi-Tədqiqat Mamalıq və Ginekologiya İnstitutuna müraciət edib. Müayinə zamanı pasiyentdə iki uşaqlıq, iki uşaqlıq boynu (uşaqlıq boynunun biri digərinin servikal kanalına açılır), iki uşaqlıq borusu kimi ciddi inkişaf qüsurları aşkarlanıb.

İnstitutdan Aztibb.az-a bildirilib ki, geniş şəkildə aparılan müayinələrin nəticəsi olaraq pasiyentə miomatoz uşaqlıq, hematosalpinks, endometriyanın hiperplaziyası, uşaqlığın inkişaf anomaliyaları diaqnozları qoyulub və hər iki uşaqlığın artımlarla birlikdə ekstirpasiyası əməliyyatı təyin olunub.

Hər iki uşaqlığı qidalandıran damarların anomal yerləşməsi, endoserviksin iki, ekzoserviksin bir olması əməliyyatın çətin keçməsinə səbəb olub.

Baş həkim Elmar Qaçabəyov, Anesteziologiya və reanimasiya şöbəsinin müdiri Nurəngiz Əhmədova, mama-ginekoloqlar Aysel Bəyişova və Yeganə Axundovanın iştirakı ilə əməliyyat fəsadsız şəkildə uğurla sonlanıb və hər iki uşaqlıq xaric edilib.