Aztibb.az-a Mərkəzdən bildirilib ki, öncə ermənilərin xalqımıza qarşı həyata keçirdiyi soyqırımlar nəticəsində həyatını itirmiş, Vətənimizin ərazi bütövlüyü uğurunda həlak olmuş şəhidlərimizin xatirəsi bir dəqiqəlik sükutla yad edilib.

 

Tədbiri giriş sözü ilə açan Qazax MDM-in direktoru Kamandar İbrahimov 1918-ci ilin mart soyqırımının öz amansızlığına və miqyasına görə təkcə Azərbaycan tarixində deyil, bəşər tarixində də ən qanlı faciələrdən biri olduğunu söyləyib. O, Azərbaycanlıların soyqırımının təkcə Bakıda deyil, Şamaxı, Quba qəzalarında, Qarabağda, Zəngəzurda, Naxçıvanda, Lənkəranda, Gəncədə və digər bölgələrdə xüsusi qəddarlıqla həyata keçirildiyini bildirib. Direktor dinc əhalinin kütləvi qətlə yetirilidiyini, şəhər və kəndlərin yandırıldığını, milli mədəniyyət abidələrinin məhv edildiyini diqqətə çatdırıb.

 

Daha sonra İnsan resusları şöbəsinin müdiri Arifə Mirzəliyeva mart qırğınları zamanı ermənilərin bir çox qədim binaları, tarixi abidələri, o cümlədən ziyarətgahları, dünya memarlığının incilərindən sayılan İsmailiyyə binasını top atəşinə tutaraq dağıtdıqlarını xatırladıb. O, Xəzər dənizində yerləşdirilmiş hərbi donanmanın açdığı atəş nəticəsində Cümə və Təzəpir məscidlərinin minarələrinin ağır zədə aldığını vurğulayıb.

 

Qazax MDM-in ictimaiyyətlə əlaqələr üzrə mütəxəssisi Günel Bəxtiyarlı çıxışında tarixin səhifələrini vərəqləndikcə yeni-yeni faktların, erməni vəhşiliyinin tükürpədən səhnələrinin üzə çıxdığını qeyd edib. Təkzibolunmaz arxiv sənədlərinin, soyqırımlarını təsdiqləyən çoxsaylı dəlil-sübutların aşkarlandığını bildirib.