23-25 mart 2023-cü il tarixlərində Xorvatiyanın Dubrovnik şəhərində nevrologiya sahəsində dünyanın aparıcı konfranslarından biri olan Nevrologiyada Mübahisələr üzrə 17-ci Ümumdünya Konqresi keçirilib.

Bu barədə Aztibb.az-a Elmi-Tədqiqat Tibbi Bərpa İnstitutundan məlumat verilib.

Dünyanın müxtəlif ölkələrinin nevroloqlarının iştirak etdiyi beynəlxalq tədbirdə Azərbaycanı Səhiyyə Nazirliyinin mütəxəssis ekspertləri, nevroloqlar prof. Rəna Şirəliyeva, prof. Sədaqət Hüseynova və prof. Aytən Məmmədbəyli təmsil ediblər. Bununla yanaşı, azərbaycanlı alimlər Məsud Aşina və Hakan Aşina da məruzələrini təqdim ediblər.

Tədbirdə Səhiyyə Nazirliyinin Elmi-Tədqiqat Tibbi Bərpa İnstitutunun direktoru, prof. Sədaqət Hüseynova "Aşağı ətraf periferik sinirlərinin odlu silah yaralanması olan xəstələrin reabilitasiyası" mövzusunda məruzə ilə çıxış edib.

Qeyd edək ki, konfransda müasir nevrologiyanın aktual məsələləri – baş ağrıları, dağınıq skleroz, Parkinson xəstəliyi, insult, epilepsiya, neyrodegenerativ xəstəliklər ətrafında geniş müzakirə və debatlar aparılıb.