TƏBİB və Hemofiliyalı Xəstələrin Respublika Assosiasiyası tərəfindən Lənkəran Rayon Mərkəzi Xəstəxanasında yeni fizioterapevtik və reabilitasiya kabinetlərinin açılışı olub.

Hemofiliyalı Xəstələrin Respublika Assosiasiyasından Aztibb.az-a bildirilib ki, Lənkəran Rayon Mərkəzi Xəstəxanasının 2 fizioterapevtik kabinetini tam olaraq tibbi avadanlıqlarla və tibbi mebellə təchizatlandırılıb.

Təchizatlanan Fizioterapevtik kabinetlər hemofiliya və digər qanın laxtalanma pozğunluğundan əziyyət çəkən vətəndaşların xəstəliyin verdiyi fəsadların aradan qaldırılmasına və müalicənin multidisiplinar yanaşmasına xidmət edəcək.

Kabinetlərin açılışından sonra Lənkəran və ətraf rayonlardan iştirak edən həkimlər üçün elmi seminar keçirilib.

Seminarda TƏBİB-in Xüsusi profilli tibbi xidmətlərin təşkili şöbəsinin müdiri Vüsal Yusifov və Koordinasiya şöbəsinin müdiri Mübariz Ağayev Hemofiliyalı Xəstələrin Respublika Assosiasiyasının fəaliyyətinin vacibliyini vurğulayaraq, bundan sonra da Assosiasiyaya dəstək olacaqlarını bildiriblər.

Hemofiliyalı Xəstələrin Respublika Assosiasiyasının sədri Ayaz Hüseynov Assosiasiyanın fəaliyyəti və dövlət səhiyyə qurumları ilə sıx əməkdaşlığın faydalı nəticələrindən bəhs edib. Bundan başqa, Assosiasiyanın 2023-cü il ərzində fəaliyyətləri haqda ətraflı məlumat verilib.

Seminarın elmi hissəsində Respublika Klinik Xəstəxanasının Hematologiya şöbəsinin müdiri Naidə Hüseynzadə, Respublika Klinik Xəstəxanasının Fizizioterapiya şöbəsinin müdiri Yeganə Əzizova və Yeni Klinika xəstəxanasının hematoloqu Sevil Cəlilova elmi və praktik təqdimatları ilə çıxış ediblər.

Qeyd edək ki, növbəti fizioterapevtik kabinetin təchizatlanması Füzuli və Göyçay şəhərlərində gözlənilir.