Azərbaycanda son sutka ərzində 182 nəfər “COVID-19”a yoluxub, 145 nəfər sağalıb, 2 nəfər vəfat edib. Son günlər bir qədər arxa plana atdığımız COVID-19 bir sıra ölkələrdə ikinci baharını yaşamaqdadır. Yerli mütəxəssislər əhaliyə müraciət edərək təhlükəsizlik tədbirlərinə bir daha diqqət çəkiblər.

Aztibb.az xəbər verir ki, TƏBİB-in infeksion xəstəliklər üzrə İşçi Qrupunun üzvü Nəzrin Mustafayeva “Real TV”yə açıqlamasında arxayınlaşmağın ağır nəticələrə səbəb olacağını bildirib: “Bəzi qonşu dövlətlərdə, həmçinin bir sıra Avropa ölkələrində yoluxma statistikasına nəzər salsaq, artımın baş verdiyini görərik. Hətta son həftələr ərzində Fransa, Niderland, Böyük Britaniya kimi ölkələrdə ilk dalğa dediyimiz dövrlə - mart, aprel, may aylarındakı gündəlik yoluxma sayından daha çox rəqəmlər müşahidə olunur. Bu onu göstərir ki, tədbirli davranmaq lazımdır. Ölkədə vəziyyət nə qədər stabil olsa belə, artım müşahidə olunmasa da, bu o demək deyil ki, hər zaman belə olacaq. Biz öz tədbirlərimizi görməliyik”.

Mövsüm dəyişdikcə, infeksion xəstəliklərin yayılma riski də yüksək olur. Havalar soyuduqca insanlar daha çox qapalı məkanlara üz tuturlar. Belə məkanlarda nəfəsliyin bağlı qalması bir çox hallarda xəstəliklərin inkişafına zəmin yaradır.

Qeyd edək ki, indiyə qədər Azərbaycanda 40 min 931 nəfər koronavirusa yoluxub. Onlardan 38 min 713 nəfəri sağalıb, 600 nəfər isə vəfat edib.