TƏBİB-in tabeliyində fəaliyyət göstərən Bakı Baş Səhiyyə Mərkəzində “e-Təbib” proqramına ambulator və stasionar müraciətlərin daxil edilməsi, elektron sistem üzərindən ixtisaslı həkimlərə və laborator-diaqnostik müayinələrə göndərişlərin və tibbi arayışların verilməsi mövzusunda təlimlər keçirilir.

Aztibb.az Mərkəzin feysbuk səhifəsinə istinadla xəbər verir kiz, tibb qeydiyyatçılarının iştirak etdiyi təlimlərin əsas məqsədi tibb müəssisələrində qeydiyyat işinin təkmilləşdirilməsi, əhaliyə göstərilən xidmət keyfiyyətinin yaxşılaşdırılması və səhiyyə xidmətlərinə əlçatanlığın təmin olunmasıdır.

Təlimləri keçirən Mərkəzin Monitorinq şöbəsinin mütəxəssisi Aytel Əmrahova bildirib ki, ilboyu aparılmış monitorinq yoxlamaları zamanı tabeli tibb müəssisələrində “e-Təbib” proqramı ilə işləyən tibb qeydiyyatçılarının işində bir sıra nöqsanlar aşkar olunub:

“Təlimlərin keçirilməsində əsas məqsəd bu sahədə olan nöqsanların aradan qaldırılması və işin optimallığının təmin olunmasıdır. Belə ki, vaxtaşırı tibb qeydiyyatçıları ilə keçirilən bu təlimlər onların biliklərinin artırılmasına xidmət etməklə yanaşı, müəssisələrdə bu sahədə olan ümumi vəziyyəti dəyərləndirməyə imkan verəcək”.

Sonda təlim iştirakçılarının sualları cavablandırılıb.