İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyevin və TƏBİB-in İcraçı direktoru Vüqar Qurbanovun başçılıq etdiyi nümayəndə heyəti İsraildə işgüzar səfərdə olub.

 

Bu barədə Aztibb.az-a TƏBİB-dən məlumat verilib.

 

Nümayəndə heyəti İsrail Dövlət Səhiyyə Nazirliyi, Clalit Səhiyyə Xidməti, Magen David Adom Milli Əməliyyatlar Mərkəzi, Sheba Hospital və Tel Aviv Sourasky Tibbi Mərkəzinin fəaliyyətləri və buradakı müasir tibbi avadanlıqlarla tanış olublar.

 

Həmçinin Azərbaycan nümayəndə heyətinin İsrail Dövlət Səhiyyə Nazirliyinin baş direktorunun müavini Şəfi Mendeloviç, Clalit Səhiyyə Xidmətinin Mushlam Sığortanın rəhbəri Eyal Jacobson, İsrail Dövlət Səhiyyə Nazirliyinin Planlaşdırma, Büdcə və Qiymətləndirmə Departamentinin direktor müavini Haim Hoffert, Beynəlxalq Əlaqələr Departamentinin rəhbəri Asher Shalmon, Magen David Adom Milli Əməliyyatlar Mərkəzinin Fövqəladə halların idarə edilməsi və Avropa İttifaqı layihələri koordinatoru Chaim Rafalovski və Sheba Hospitalının Beynəlxalq əlaqələr şöbəsinin müdiri Yair İtzhar ilə görüşləri baş tutub.

 

Görüşlərdə universal sağlamlığın təminatı, İsrailin tibbi sığorta sistemi, tibb müəssisələrinin idarəedilməsində sığorta sisteminin rolu, tibbi xidmətlərin genişləndirilməsi üçün tövsiyə olunan strategiyalar, səhiyyə sisteminin elektronlaşdırılması, mobil səhiyyə xidmətinin yaradılması və tətbiqetmənin optimallaşdırılması mexanizmləri, təcili və profilaktik tibbi yardım xidmətinin funksionallığı və təkmilləşdirilməsi haqqında danışılıb. Eyni zamanda, Azərbaycanın tibb müəssisələrinin rəhbər heyəti üçün insan kapitalının inkişafı və artırılması mövzularında təlimlərin keçirilməsi barədə müzakirələr aparılıb.