Elmi-Tədqiqat Tibbi Bərpa İnstitutunun direktoru, prof. Sədaqət Hüseynovanın rəhbərlik etdiyi nümayəndə heyəti Naftalan şəhərində ezamiyyətdə olub.
İnstitutdan Aztibb.az-a verilən xəbərə görə, nümayəndə heyəti Naftalan şəhər İcra Hakimiyyətində görüş keçirib.
Görüş zamanı Naftalan şəhər İcra Hakimiyyəti başçısının müavini Arzu Məmmədov və digər məsul şəxslər kurort şəhərinin sanator-kurort müəssisələrinin fəaliyyətindən danışıb və institutun əməkdaşları ilə birlikdə bu sahədə qarşıda düran vəzifələr haqqında müzakirələr aparıblar.
Sonra nümayəndə heyəti naftalanla müalicənin geniş təmsil olunduğu “Çinar” otelini ziyarət edərək, müalicə şöbələrinin yüksək səviyyəli xidməti ilə yerində tanış olublar.
Mövcud şərait haqqında məlumat aldıqdan sonra Naftalan şəhərində kurort industriyasının inkişaf etdirilməsi və modernləşdirilməsi üçün sanator-kurort müəssisələri ilə birlikdə geniş elmi-praktik fəaliyyət haqqında razılığa gəlinib.