Naxçıvan Dövlət Universitetinin (NDU) Tibb fakültəsində Ümumi təbabət və klinik fənlər kafedrasının müdiri, tibb üzrə fəlsəfə doktoru, dosent Gültəkin Əliyevanın 70 illik yubileyi qeyd olunub.

Universitetdən Aztibb.az-a verilən xəbərə görə, yubiley tədbiri çərçivəsində G.Əliyevanın Azərbaycan dilində çap olunmuş “Ginekologiya” adlı dərs vəsaitinin təqdimatı da keçirilib.

Tədbirdə NDU-nun rektoru Elbrus İsayev yubilyarın beynəlxalq və yerli konfranslarda iştirakından, tibb təhsilinin inkişafına verdiyi töhfələrdən söz açıb. Bildirib ki, G.Əliyevanın məhsuldar elmi axtarışlarının nəticəsində bu gün tibb sahəsinə əhəmiyyətli olacaq dərs vəsaitinin təqdimatının keçirilməsi sevindirici haldır.

Yubilyarı 70 illik yubileyi münasibətilə təbrik edən rektor ona universitetin Fəxri fərmanını təqdim edib.

Daha sonra Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova, Tibb fakültəsinin dekanı, biologiya üzrə fəlsəfə doktoru, dosent Elsevər Əsədov, Ümumi təbabət və klinik fənlər kafedrasının dosenti Cəbi İsmayılov və digərləri G.Əliyevanı 70 illik yubileyi və nəfis tərtibatda çap olunan kitabı münasibətilə təbrik ediblər.

Qeyd olunub ki, Naxçıvan Dövlət Universitetində tibbi kadrların yetişdirilməsinə xidmət edən yubilyar 44 məqalənin, 5 dərs vəsaiti, 2 metodik vəsait və “Qızlarla səmimi söhbət” kitabçasının müəllifidir.

Vurğulanıb ki, Elm və Təhsil Nazirliyinin qrifi ilə çap edilən və ilk dəfə olaraq Azərbaycan dilində nəşr olunan “Ginekologiya” adlı dərs vəsaiti universitetin Tibb fakültəsinin, Azərbaycan Tibb Universitetinin müəllim və tələbə heyəti, eyni zamanda həkim-ginekoloqlar üçün nəzərdə tutulub.

Sonda Gültəkin Əliyeva tədbirin təşkilində əməyi keçənlərə, eləcə də iştirakçılara xoş sözlərə və təbriklərə görə minnətdarlığını bildirib.