Mən uşaq olanda qonşuluğumuza yurdlarından didərgin salınmış soydaşlarımız yerləşmişdi. Tarix müəllimim Füzulidən məcburi köçkün düşmüşdü. Sinif yoldaşımgil Laçından çıxarkən xəstə anasını gətirə bilməmişdilər... İllər ötsə də, bu problem öz həllini tapmadı. Əminəm ki, Azərbaycan Ordusunun əks-hücum əməliyyatı buna son qoyacaq, yaralarımıza məlhəm olacaq.
Bu sözləri müsahibəsində Naxçıvan şəhər sakini, həkim Mətanət Səfərova deyib.
“O vaxtlar atam könüllü Qarabağa getmişdi. Bizim uşaqlığımız hərbi mahnılar öyrənməklə keçdi. Atam müharibədən gələndə Fəxri xiyabanda dəfn olunan dostlarını yad edirdik və bu günədək mən Qarabağ ilə əlaqəli görüntülərə baxa bilmirdim, ürəyim parçalanırdı. Axı, bu vəhşiliyə necə susmaq olar?” – deyən Mətanət Səfərova vurğulayıb ki, indi fərəhlənir: “Əlimdə olsa, o səngərdə əsgərlərimizlə birlikdə döyüşərəm! Bu gün xalqımızla daha çox fəxr edirəm, necə böyük xalq olduğumuzu bütün dünya bir daha gördü”.
Mətanət Səfərova deyib: “Həyat yoldaşım hərbçidir. O, evə gəlməsə də, mən narahat deyiləm, var gücümlə uşaqlara onun yoxluğunu hiss etdirməməyə çalışıram. Ona bir sözüm var, yerində möhkəm ol, sənə orada ehtiyac var. Biz ordumuza da, Prezidentimizə də inanırıq, yetər ki, qanımız yerdə qalmasın!”