Akademik Zülfüqar Məmmədov adına Xəstəxananın Pediatriya şöbəsinin pediatrı Yüksəl Hüseynli “Uşaqları mövsümi xəstəliklərdən qorumağın yolları” barədə suallarımızı cavablandırıb.
- Uşaqlarda payız aylarında rast gəlinən xəstəliklər hansılardır?
- Payız aylarının başlaması ilə əlaqədar uşaqlarda qrip, sinusit, faringit, laringit, otit kimi yuxarı tənəffüs yolu infeksiyaları, bronxit və pnevmoniya kimi aşağı tənəffüs yolu infeksiyaları, eləcə də bu günlərdə geniş yayılmış Koksaki virusuna tez-tez rast gəlinir, qusma və ishal hallarının sayında artış baş verir. Bu hala əsasən bağça və məktəb yaşlı uşaqlarda rast gəlinir. Səbəb isə immun sistemi hələ tam inkişaf etməmiş uşaqların qapalı mühitdə bir-biri ilə yaxın təmasda olmalarıdır. İl ərzində uşaqların 6-8 dəfə müxtəlif tənəffüs yolu xəstəlikləri keçirməyi normaldır.
- Bəs uşaqları xəstəliklərdən qorumaq üçün nə etmək lazımdır?
- Xəstəliklərdən qorunmaq üçün, ilk növbədə, körpələrə mütləq 2 yaşa qədər ana südü verilməlidir. Bundan başqa, uşaqların peyvəndləri vaxtında müvafiq qaydada vurulmalı, uşaqlar olan otağın temperatur və nəmişliyinə, havasının tez -tez dəyişməyinə fikir verilməlidir. Həmçinin uşaq olan evdə siqaret çəkilməməyinə üstünlük verilməli, uşaqlarda əlləri tez-tez yuma vərdişi yaradılmalı, xəstə insanlarla təmasın qarşısı alınmalıdır.
- Xəstəliklərdən qorunmaq üçün qidaya necə diqqət edilməlidir?
- Uşaqlar tək çeşidli qidalandırılmamalı, karbohidrat, zülal və yağlar balanslı şəkildə verilməli, meyvə, tərəvəzə üstünlük verilməlidir. Qida rasionunda hər gün yumurta olmalı, həftədə 1-2 dəfə balıq yeyilməlidir.
