Böyrək daşı problemindən əziyyət çəkən şəxslər tərkibində oksalat maddəsi olduğu üçün xüsusən çərəz, ispanaq və kakao istehlakını azaltmalıdırlar.

 

Bu barədə Aztibb.az-a Azərbaycan Tibb Universitetinin Tədris Cərrahiyyə Klinikasının həkim-nefroloqu Barat Yusubov deyib.

 

Protein, kalsium və xüsusilə də pomidorda olan oksalat maddəsinin böyrəklərin fəaliyyətinə mənfi təsir göstərdiyini deyən mütəxəssis bildirib ki, böyrək daşı olanlar protein qəbuluna diqqət etməlidirlər. Əgər yemək qəbulu zamanı protein qəbul edirsizsə (hər hansı ət və ya ət məhsulu), digər yemək qəbulu zamanı lifli qidalara üstünlük vermək, əgər səhər çox miqdarda pendir yeyirsinizsə, günorta ət xörəyi yemək məsləhətdir.

 

Nefroloqun sözlərinə görə, kifayət qədər su istehlakı maddələr mübadiləsinə müsbət təsir edir: “Beləliklə, böyrəklərdə kristallaşma azalır, mövcud olan kiçik kristallar orqanizmdən ifraz olunur. Az su içildiyində isə, maddələr mübadiləsi zəifləyir və böyrəklərdə daş əmələ gəlməsinə səbəb olan kalsium, oksalat kimi maddələr kristallaşmağa başlayır, zaman keçdikcə daşa çevrilir. Böyrəklərinizdə daş əmələ gəlməməsi üçün gündəlik olaraq 2 litrə yaxın su qəbul edin. Əgər siz 2 litr su içib, gündəlik o suyun bədəndən ifraz olmadığını, şişkinlik yaratdığını hiss edirsinizsə, su miqdarını azaltmalı və həkimə müraciət etməlisiniz".