2002-ci il təvəllüdlü Xavər Nəzirova 10 yanvar 2023-cü il tarixində Mərkəzi Neftçilər Xəstəxanasının Anesteziologiya, reanimasiya və intensiv terapiya şöbəsinə beyin qan dövranının hemorragik tipli pozulması, beyindaxili qanaxma, beyin ödəmi, sağtərəfli hemotoraks, inkişafdan qalmış 16 həftəlik hamiləlik, anemiya və sepsis diaqnozları ilə kəskin ağır vəziyyətdə daxil olub.
Bu barədə Aztibb.az-a Mərkəzi Neftçilər Xəstəxanasından məlumat verilib.
Bildirilib ki, xəstənin durumu ilə bağlı TƏBİB tərəfindən dəfələrlə konsilium keçirilib və ölkənin tanınmış mütəxəssisləri cəlb ediliblər.
Pasiyent xəstəxanaya daxil olduğu andan Anesteziologiya, reanimasiya və intensiv terapiya şöbəsinin müdiri, reanimatoloq-anestezioloq Samirə Məmmədova və reanimasiya heyətinin nəzarəti altında olub.
Konsiliumun qərarlarına əsasən müxtəlif tarixlərdə neyrocərrah Elşən Ağabalayev, cərrah-ginekoloq Yaşar Həsənov və ümumi cərrah Fuad Qurbanov tərəfindən bir neçə əməliyyat icra edilib.
Xəstəxanada yatdığı müddətdə mütəmadi olaraq infeksionist Natiq Əliyev tərəfindən konsultasiya olunub.
Xavər Nəzirovanın vəziyyəti TƏBİB və xəstəxana rəhbərliyinin daim diqqət mərkəzində olub.
01.03.23 tarixində xəstə nisbi-stabil şəkildə, reabilitasiyasının davam etdirilməsi şərti ilə evə buraxılıb.