Kliniki Tibbi Mərkəzin Toksikologiya şöbəsinin və Təcili təxirəsalınmaz tibbi yardım bölməsinin əsaslı təmirdən sonra açılışı olub.

TƏBİB-dən Aztibb.az-a verilən xəbərə görə, açılış mərasimində İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, TƏBİB-in İcraçı direktoru Vüqar Qurbanov, Kliniki Tibbi Mərkəzin direktoru Könül Ələkbərov və b. iştirak ediblər.

Könül Ələkbərov 1982-ci ildə yaradılmış Toksikologiya şöbəsi və Təcili təxirəsalınmaz tibbi yardım bölməsində olan yeniliklər, yaradılan şəraitlə bağlı ətraflı məlumat verib. Bildirib ki, Qafqazda ilk kəskin kimyəvi zəhərlənmələrin müayinəsi və müalicəsi ilə məşğul olan Toksikologiya şöbəsi artıq tamamilə yeni və ən müasir tibbi avadanlıqlarla təchiz olunub.

Diqqətə çatdırılıb ki, Toksikologiya şöbəsində zəhərlənmiş qanın təmizlənməsi üçün ən müasir ekstrakorporal metodlardan istifadə edilir. Şöbə süni tənəffüs aparatları, defibrilyator, EKQ aparatları, təcili yardım arabaları ilə təchiz edilib.

Bundan başqa, şöbədə kəskin dərman zəhərlənmələrində effektiv olan hemosorbsiya (qanın təmizlənməsi) üçün müasir avadanlıqlar, o cümlədən kəskin böyrək çatışmazlığı halları üçün 2 yerlik hemodializ və osmos aparatı da var. Həmçinin kəskin dəm qazı zəhərlənmələri üçün Barokamera bölməsi yenidən bərpa edilib. Yeyici turşularla zəhərlənmə zamanı yemək borusunun, mədə və onikibarmaq bağırsağın müayinəsi üçün ən müasir endoskopiya otağı yaradılıb.

Bildirilib ki, əsaslı təmir olunan Təcili təxirəsalınmaz tibbi yardım bölməsi isə 6 müşahidə çarpayısı, bir canlandırma otağı (CPR), rentgen və kompüter tomoqrafiya cihazı (KT) ilə təchiz edilib. Əlavə olaraq bölmədə tam müşahidə-kamera sistemi quraşdırılıb ki, bu da xəstələr və xidmət göstərən tibb işçilərinin izlənilməsinə imkan yaradır.