Azərbaycanda ilk dəfə Beynəlxalq Nadir Xəstəliklər Gününə həsr edilən elmi simpozium keçirilib.
TƏBİB-dən Aztibb.az-a verilən xəbərə görə, tədbir Pasiyent Təşkilatları İttifaqı ilə Azərbaycan Hematologiya Mütəxəssisləri İctimai Birliyinin birgə təşkilatçılığı ilə gerçəkləşib.
Simpoziumda TƏBİB-in İcraçı direktorunun müşaviri Pərvin Əkbərov “Nadir xəstəliklərdə fizioterapiya və reabilitasiyanın rolu” adlı təqdimatla çıxış edib.
TƏBİB-in departament rəhbəri Teymur Mirzəbəyli isə çıxışında nadir xəstəlikləri olan vətəndaşların sayının az olmasına baxmayaraq, bu istiqamətdə aidiyyəti dövlət qurumları tərəfindən mütəmadi işlərin görüldüyünü diqqətə çatdırıb.
Daha sonra M.Ə.Mirqasımov adına Respublika Klinik Xəstəxanasının Hematologiya şöbəsinin müdiri Naidə Hüseynzadə “Hemofiliya və onun müasir müalicəsi” mövzusunda məruzə ilə çıxış edib.
Elmi simpoziumda müxtəlif profillər üzrə rast gəlinən nadir xəstəliklər haqqında Azərbaycanın aparıcı mütəxəssisləri tərəfindən məlumatlar verilib.
Sonda mövzu ətrafında müzakirələr aparılıb, suallar cavablandırılıb.
