Səhiyyə naziri Teymur Musayevin müvafiq əmri ilə tibb üzrə fəlsəfə doktoru Lətif Zeyniyev Elmi-Tədqiqat Pediatriya İnstitutunun direktoru vəzifəsinə təyin olunub.
Nazirlikdən Aztibb.az-a bildirilib ki, Lətif Zeyniyev 2003-cü ildə Azərbaycan Tibb Universitetinin (ATU) Pediatriya fakültəsini fərqlənmə diplomu ilə bitirib. ATU-nun Uşaq cərrahlığı kafedrasında əyani aspirantura təhsili alıb.
Dissertasiya işini uğurla müdafiə edən L.Zeyniyev 2010-cu ildə Azərbaycan Respublikası prezidenti yanında Ali Attestasiya Komissiyasının qərarı ilə “Tibb üzrə fəlsəfə doktoru” alimlik dərəcəsini alıb.
O, 2014-2023-cü illərdə Almaniyanın Hannover, Düsseldorf və Ştutqart şəhərlərində uşaq cərrahı olaraq assistent - həkim, mütəxəssis - həkim, baş mütəxəssis - həkim, idarəedici baş mütəxəssis - həkim vəzifələrində fəaliyyət göstərib.