Göygöl Rayon Mərkəzi Xəstəxanasında Xocalı soyqırımının 31-ci ildönümü ilə əlaqədar tədbir keçirilib.

Xəstəxanadan Aztibb.az-a bildirilib ki, öncə faciə qurbanlarının xatirəsi bir dəqiqəlik sükutla yad edilib.

Tədbiri çıxış sözü ilə açan Göygöl Rayon Mərkəzi Xəstəxanasının direktoru Vasif Əliyev 31 il bundan öncə Ermənistan silahlı qüvvələrinin, keçmiş SSRİ-nin 366-cı motoatıcı alayının köməyi ilə müxtəlif istiqamətlərdən Xocalı şəhərinə hücum etdiyini, qadınlar, uşaqlar və yaşlılar da daxil olmaqla yüzlərlə azərbaycanlı mülki şəxsi xüsusi amansızlıqla qətlə yetirdiyini qeyd edib.

O, 1992-ci il fevralın 25-dən 26-na keçən gecə Ermənistan silahlı qüvvələrinin bütün beynəlxalq hüquq normalarını pozaraq dinc əhaliyə misli görülməmiş qəddarlıqla divan tutduğu həmin hərbi-siyasi təcavüz zamanı 613 həmvətənimizin həlak olduğunu, 487 dinc sakinin ağır yaralandığını, 1275 nəfərin girov götürülərək işgəncələrə məruz qaldığını bildirib.

Sonda tədbir iştirakçıları Göygöl rayon Şəhidlər Xiyabanına ziyarət ediblər. Onlar Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsini yad edib, ruhlarına dualar oxuyub, məzarları üzərinə gül dəstələri qoyublar.