Türkiyə Prezidenti Rəcəb Tayyib Ərdoğan Kahramanmaraş mərkəzli zəlzələlərdən sonra bölgədəki şəhərlərdən müalicə üçün Ankaraya gətirilən yaralıları ziyarət edib.

Aztibb.az-ın medimagazin.com.tr-yə istinadla xəbərinə görə, Rəcəb Tayyib Ərdoğan Ankara Universiteti Tibb fakültəsi Cebeci Araşdırma və Tətbiq Xəstəxanasının Uşaq şöbəsində zəlzələnin 248-ci saatında Kahramanmaraşda dağıntılar altından xilas edilən 17 yaşlı Aleyna Ölməz, Hataydan gətirilən 16 yaşlı Hülyasu Kısa, 8 yaşlı Feyza Nur Yakar, Şanlıurfadan gətirilən 7 yaşlı Miraç Eren Döner, 10 yaşlı Ayça Çepni və 9 yaşlı Zeynep Küçükleri ziyarət edib.

Türkiyə Prezidentini həyat yoldaşı Əminə Ərdoğan,  Səhiyyə Nazirinin müavini, prof. Sabahattin Aydın, Ankara valisi Vasip Şahin, Ankara İl Sağlamlıq müdiri, uzman həkim Əli Niyazi Kurtcebe və Etlik Şəhər Xəstəxanasının baş həkimi, dos. Bülənt Güngörer müşayiət edib.

Rəcəb Tayyib Ərdoğan yaralılara şəfa diləyib, həkimlərdən onların sağlamlıq durumu ilə bağlı məlumat alıb.

Prezident Ərdoğanın ziyarət etdiyi adlar arasında Adıyamanda 3 gün qaldığı dağıntılar altından Zonguldağlı mədənçilər tərəfindən xilas edilən 19 yaşlı Songül Göksu və Hatayda zəlzələnin 3-cü günündə dağıntılar altından çıxarılaraq Prezident təyyarəsi ilə Adanadan Ankaraya gətirilən 14 yaşlı İnci Aşit də olub.