Abşeron Rayon Mərkəzi Xəstəxanasının direktoru Azər İsmayılov 27 yanvar 2023-cü il tarixində Azərbaycan Respublikasının İrandakı səfirliyinə silahlı hücum zamanı terrorçunu zərərsizləşdirən mühafizə xidmətinin əməkdaşı Vasif Tağıyevi evində ziyarət edib.

 

Bu barədə Aztibb.az-a Abşeron Rayon Mərkəzi Xəstəxanasından məlumat verilib.

 

Terrorçunun zərərsizləşdirilməsində şücaət göstərən Vasif Tağıyev hadisə zamanı 6 qəlpə xəsarəti alıb. Tehranda keçirilən və 5 saata yaxın davam edən əməliyyatla qəlpələr onun bədənindən çıxarılıb. O, Prezident İlham Əliyevin Sərəncamı ilə Azərbaycan Respublikasının İran İslam Respublikasındakı Səfirliyinə qarşı törədilmiş terror aktının qarşısının alınması zamanı həyat və sağlamlıq üçün real təhlükə şəraitində xidməti borcu yerinə yetirərkən mərd və qətiyyətli hərəkətlərinə görə 1-ci dərəcəli "Rəşadət" ordeni ilə təltif edilib.

 

Qeyd edək ki, Vasif Tağıyevin anası Təranə Tağıyeva Abşeron Rayon Mərkəzi Xəstəxanasının Masazır Ailə Sağlamlıq Mərkəzində tibb bacısı vəzifəsində çalışır.