Böyrək daşının yaranması xəstənin hansı bölgədən olmasından daha çox asılıdır. Məsələn, böyrək daşlarına cənub bölgəsinin sakinlərində daha çox rast gəlinir. Bu, müəyyən irsi və metabolik xəstəliklərlə də bağlı ola bilir.

Aztibb.az xəbər verir ki, bu barədə ATU-nun Urologiya kafedrasının dosenti Rəşad Məmmədov məlumat verib.

Həkim bildirib ki, böyrəkdəki daşlar tərkibinə görə fərqlənir: həm infeksion daşlar, həm də oksalat olur. Azərbaycanda rentgen neqativ (urat) daşlara kifayət qədər çox rast gəlinir. Bu isə, azərbaycanlıların menyusunda ət yeməklərinin çox olması ilə əlaqədardır.

Rəşad Məmmədov böyrək daşının yaranmasının xəstənin yaşından asılı olmadığını deyib. Qeyd edib ki, praktikamızda əməliyyat etdiyimiz ən kiçik xəstəmizin 2, ən yaşlısının isə 92 yaşı olub. 

O, bildirib ki, böyrək daşlarının perkutan üsulla çıxarılması əməliyyatında əsas risk qanaxma ilə bağlıdır: “Çünki böyrək qanayan bir orqandır - dəqiqə ərzində böyrəkdən 1 litrə qədər qan keçir. İkinci risk anesteziya ilə əlaqəlidir. İndiyədək bizim klinikada keçirdiyimiz əməliyyatlarda hər hansı problemli situasiya yaranmayıb”.