Balakən Rayon Mərkəzi Xəstəxanasında Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş şahmat turniri keçirilib.

Xəstəxanadan Aztibb.az-a bildirilib ki, əvvəlcə Ulu Öndər Heydər Əliyevin və Vətən müharibəsi şəhidlərinin əziz xatirəsi bir dəqiqəlik sükutla yad edilib.

Tədbirdə Balakən Rayon Mərkəzi Xəstəxanasının direktoru Dilbər Quliyeva çıxış edərək Ümummilli Lider Heydər Əliyevin xalqımız və dövlətimiz qarşısında misilsiz xidmətlərindən danışıb. Bildirib ki, müasir Azərbaycanın əldə etdiyi tarixi nailiyyətlər dahi şəxsiyyət Heydər Əliyevin adı ilə bağlıdır.

Sonra turnirə start verilib. Gərgin mübarizə şəraitində keçən şahmat yarışında kişi iştirakçılar arasında dəri-zöhrəvi həkimi Fərman Məmmədov 1-ci yerə, təqaüdçü stomatoloq Fərhad Əliyev 2-ci yerə, Əməliyyat bölməsinin müdiri Əsgər Axundov isə 3-cü yerə layiq görülüblər. Qaliblər xatirə hədiyyələri ilə mükafatlandırılıblar.

Qalib olan qadın iştirakçılar isə Fəxri fərman və hədiyyələrlə təltif olunublar. Digər 17 iştirakçıya isə həvəsləndirici mükafatlar verilib.