Anamnezində 13 düşük olan qadın Elmi-Tədqiqat Mamalıq və Ginekologiya İnstitutunda (ETMGİ) sağlam şəkildə övladına qovuşub.

 

İnstitutdan Aztibb.az-a bildirilib ki, hamiləliyin təxminən 10-11-ci həftələrində ETMGİ-yə müraciət edən 38 yaşlı qadın mama-ginekoloq, t.ü.f.d. Leyla Süleymanova tərəfindən müayinə olunub.

 

Hamiləlik hipertenziyası, düşük təhlükəsi diaqnozları ilə pasiyent bir neçə dəfə Hamiləliyin patologiyası şöbəsində stasionar müalicə alıb. Onun hamiləliyi dinamik şəkildə şüa-diaqnostika üzrə həkim Təranə Kərimova tərəfindən ultrasəs müayinələrlə nəzarətdə saxlanılıb.

 

Hamiləliyin 36-cı həftəsində dölyanı mayenin vaxtından əvvəl axması diaqnozu ilə təcili olaraq növbə həkimi Noçuyev Sərxeyil tərəfindən qeysəriyyə əməliyyatı icra olunub və cinsi kişi olan körpə dünyaya gəlib.

 

Uşaq vəziyyəti ilə əlaqədar olaraq Yenidoğulmuşların reanimasiya və intensiv terapiyası şöbəsində təxminən 10 günlük stasionar müalicədən sonra ailəsi ilə birlikdə evə yola salınıb.