Səhiyyə naziri Fahrettin Koca Hatayda baş verən 6,4 və 5,8 bal gücündə zəlzələlərdə 18-i ağır olmaqla 294 nəfərin yaralandığını açıqlayıb.

Aztibb.az medimagazin.com.tr-yə istinadla xəbər verir ki, o, bu barədə tviter hesabında yazıb.

"Bu gecə Hatayda yaşadığımız iki zəlzələdə 294 yaralı var. Təəssüf ki, onlardan 18-nin vəziyyəti çox ağırdır. Müalicə alan 95 nəfər ilk tibbi müdaxilədən sonra hava yolu ilə Adana və Dörtyola köçürülüb", - deyə nazir bildirib.

Fahrettin Koca, həmçinin Hatay mərkəzli zəlzələdən zərərçəkənləri səhra xəstəxanasında ziyarət edib. O, mərkəzi Defne rayonunda 6,4 bal gücündə zəlzələdən sonra Hatay Təhsil və Araşdırma Xəstəxanasında qurulan səhra hospitalında olub.

Səhiyyə naziri Kahramanmaraş mərkəzli zəlzələlərdən sonra bəzi səhiyyə müəssisələrinin xidmətlərini davam etdirdiyini, Hatay mərkəzli zəlzələdən sonra bəzi çatların meydana gəldiyini və bu anda təfərrüatı ilə araşdırıla bilməyəcəyini qeyd edib.