Kahramanmaraşda baş verən zəlzələlərdən sonra şəhərdə ilk səhra xəstəxanasını quran Azərbaycan komandası indiyədək mindən çox zərərçəkmişi müalicə edib.

Aztibb.az-ın medimagazin.com.tr-yə istinadla məlumatına görə,  Azərbaycan Fövqəladə Hallar Nazirliyinin (FHN) Türkiyədə fəaliyyət göstərən mobil səhra hospitallarında 11 həkim və 24 personal ilə çalışdıqlarını bildirən tibb xidməti mayoru Nigar Pənahova “Bizə nə vaxt “get” desəz, biz də gedəcəyik, Azərbaycan xalqı olaraq hər zaman türk xalqının yanındayıq” deyib.

"Ayın 9-dan burada fəaliyyətə başlamışıq və indiyədək mindən çox xəstəni müalicə etmişik. Travmatologiya, donma, sınıq və cərrahiyyə üzrə xəstələrə müdaxilələr edilib. Pasiyentlər arasında infeksiya və qastroenterologiya problemləri olanlar da olub. Hazırda sahə xəstəxanasında 11 həkim və 13 tibb bacısından ibarət 24 nəfərlik komandamız var. Həm müalicə, həm də əməliyyat üçün həkimlərlə xidmət göstəririk", - deyə Nigar Pənahova qeyd edib.

O, bildirib ki, xəstəxana bundan sonra da ehtiyaca uyğun fəaliyyət göstərəcək: Azərbaycan xalqı olaraq hər zaman türk xalqının yanındayıq. Kədərli günündə də, pis günündə də, yaxşı günündə də hər zaman yanındayıq".