Türkiyədə baş vermiş güclü zəlzələ nəticəsində minlərlə insanın həlak olması, yaralanması və evsiz qalması ilə əlaqədar Azərbaycandan qardaş ölkəyə yardım göstərilməsi davam edir. Azərbaycan Ürək və Damar Cərrahiyyəsi Cəmiyyətinin üzvləri tərəfindən zəlzələdən zərər çəkmiş şəxslərə dəstək məqsədilə Türkiyənin Fövqəladə Halların İdarə Olunması Agentliyinin (AFAD) rəsmi fonduna 12 000 AZN məbləğində vəsait göndərilib.

 

Aztibb.az-ın məlumatına görə, Azərbaycan Ürək və Damar Cərrahiyyəsi Cəmiyyətinin sədri, professor Kamran Musayev bu barədə feysbukda məlumat paylaşıb.

 

Məlumatda deyilir: "Qardaş Türkiyə Cümhuriyyətində baş vermiş zəlzələ hər kəs kimi Azərbaycan Ürək və Damar Cərrahiyyəsi Cəmiyyətinin üzvlərini də dərin kədərə boğub. Ölkəmizdə səhiyyənin, xüsusilə ürək-damar cərrahiyyəsinin bugünkü inkişafında Türkiyənin və türkiyəli həmkarlarımızın böyük dəstəyi olub, bu gün də bu dəstək davam edir.

 

Qardaş Türkiyəmizin və türk xalqının bu ağır günlərində onların yanında olmaq, mümkün bütün vasitələrlə onlara dəstək göstərmək həm insanlıq, həm qardaşlıq, həm də vicdan borcumuzdur. Dualarımız səninlədir, Türkiyə!"