17-18 fevral 2023-cü il tarixlərində Bakıda Akademik Zərifə Əliyevanın 100 illiyinə həsr olunmuş “Qadın reproduktiv orqanlarının şişləri” mövzusunda I Beynəlxalq Ginekoloji konqres keçirilib. Konqresin işində Türkiyə, ABŞ, Almaniya, Rusiyadan gəlmiş yüksəkixtisaslı mütəxəssislər yaxından iştirak ediblər.

 

Aztibb.az Mərkəzi Gömrük Hospitalına istinadla xəbər verir ki, konfransın ikinci günü – fevralın 18-də Mərkəzi Gömrük Hospitalının Mamalıq-ginekologiya şöbəsinin həkimi, tibb üzrə fəlsəfə doktoru Təranə Bayramova “Orqan transplantasiyasından əvvəl və sonra qadın resipiyentlərdə uşaqlıq boynu dəyərləndirilməsində Pap testin əhəmiyyəti” mövzusunda təqdimatla çıxış edib.

 

Orqan transplantasiyasının hər hansı bir üzvün funksiyasının tamamilə pozulması və sıradan çıxması zamanı qəbul olunmuş yeganə müalicə üsulu olduğunu diqqətə çatdıran Təranə Bayramova qeyd edib ki, son 3 ildə Türkiyədə böyrək köçürülmüş qadınların 37%-i, qaraciyər nəqli olanların 41%-i, Amerikada isə 60%-i reproduktiv yaşlı qadınlardır.

 

O, qadın resipiyentlərdə aparılan ümumi müayinələr, onların ginekoloji dəyərləndirilməsi, resipiyentlərdə transplantasiyadan əvvəl və sonra bədxassəli törəmələrin inkişafı, PAP SMEAR testi barədə konfrans iştirakçılarına ətraflı məlumat verib. Təranə Bayramova təqdimatının sonunda Mərkəzi Gömrük Hospitalında bu sahədə qazanılmış təcrübədən danışmış, konfrans iştirakçılarının suallarını cavablandırıb.